ტანკები - საქართველოს დემოკრატიული რესპუბლიკის შეიარაღებულ ძალებს 1920-დან შეიარაღებაში ჰყავდა, იმ დროისათვის ყველაზე თანამედროვე საბრძოლო მანქანა ტანკი. ეს ტანკები სახელმწიფოს ხელში ჩაუვარდა 1920-ის გაზაფხულზე, როდესაც ჩრდილო კავკასიაში ბოლშევიკებმა დაამარცხეს დენიკინის ნაწილები და გენერლების დრაცენკოსა და ერდელის შენაერთებმა საქართველოს ტერიტორიაზე ინტერნირება მოითხოვეს. რესპუბლიკის მთავრობამ მათ ნება დართო საქართველოს ტერიტორიაზე შემოსულიყვნენ, მაგრამ მათ ჩამოართვა იარაღი, მათ შორის ორი Mark V მოდელის ტანკი. ტანკები ჩარიცხეს სახალხო გვარდიის ჯავშნოსან შენაერთში, თუმცა ორივე ტანკი იყო ამორტიზებულ მდგომარეობაში და მათი შეკეთება ადგილობრივი ძალებით ვერ მოხერხდა. რუსეთ-საქართველოს 1921 წლის ომის დროს თბილისში შემოსულმა რუსებმა რკინიგზის სადგურის სახელოსნოებში მიაგნეს ტანკებს და გააგზავნეს მოსკოვში. გაგზავნამდე კი 1921 წლის 20 მარტს მეთერთეტე არმიის ჯავშანძალების მეთაური ზუნმა უკვე საბჭოთა საქართველოს სამხედრო საზღვაო ძალების კომისარს მიწერა, რომ ტექნიკის აწყობა მხოლოდ ცენტრში დიდ ქარხანაში იქნებოდა შესაძლებელი და ამიტომ ითხოვდა ტანკების მოსკოვში გაგზავნის ნებართვას, როგორც საქართველოს მთავრობის ,,საჩუქარს" რუსეთისადმი.